Monseigneur, comme votrelettre du premier de ce moys me fut rendue

je partoys pour men aller à Lyon. Je differay à vous y faire responce

jusques à mon retour, despuis lequel aulcune occasion ne sen est

presentée pour vous escrire, sinon par monsieur Faure qui partit comme

jarrivay et sans que jeusse veu monsieur de St André à qui javois asseurer

veoir la coppie de votre brevet pour adviser avec luy ce qui sen pourroit

faire sur la difficulté quil y a de pouvoir acquicter la partie contenue

en icelluy sans lettre pattentes du roy, quoy que vous aye escript

monsieur de Chastellard, car cest directement contre les ordonnances.

Ledit sieur de St André et moy avons advisé, sil vous plaict ainsi, que en

me fournissant du mandemet de messieurs les commis du païs de

ladite somme que je masseure en leur escripvant en general et particulier,

ilz ne vous desnieront, daultant quilz ne feront en cella que suivre la

volunté de lestat, et de votre quictance que vous me pourrez envoyer,

je feray despence de ladite partie en mon compte que je rendray

des deniers de la guerre et lequel, pour ceste occasion, je mappresteray

de rendre incontinant après les estatz tenuz, pourveu quil vous

plaise mander et ordonner à mesdits sieurs les commis de louir et

examiner, car cest chose qui deppend de votre aucthorité ; et si ladite

partie mest allouée, je la vous paieray, ou bien sur la radiature

comme vous mescripvez vous ferez poursuyvre lettres de restablissement

que sero[n]t comme vous mescripvez plus aisée à obtenir ; et en ce cas,

la negotiation sera beaucoup pls asseurée pour vous et moy et moings

subiecte à recherche. Je la retiendray pour la vous payer sur les

restes qui sont encor deues, car je ne lay pas comptant, comme

je nay pas aussi pour fournir au payement des compagnies

pour le prochain mois, la despence duquel pourra estre faicte des

deniers du sel qui sont provenant de limposition de IX s[ous] sur chacune

emyne au grenier de Mornas, pour le recouvrement desquelz monsieur

froment a à saddresser à ung nommé Theodé de Mainssieu. Il mest

deu encor quelques restes es bailliages de Viennoys et St Marcellin […]

[début de la réponse de M. de Gordes, marge gauche, puis sous la dernière ligne de la lettre :]

Monsieur le conte

rroleur, jey

receu votre lettre

du XIIIe de ce

moys et quant

à escrire à messieurs

du païs pour vous

fornir de mande

ment pour la

partie de sinq

mille lyvres,

tout ainssy que

de leur volunté,

il men ont fayct

bon sens [sans] les en

avoyr reserchés,

aussy ne les re

sercherey pas dudit

mandement,

estant très marry

que navés le moyen

de fornir le pay

ement du moys

prochain et

que vous estimés

que la despence

pourra estre

faycte des deniers

de limposition de

IX s sus le sel,

mays jey oppinion

quil nen y aura

pas assés. Jey

escrit comme je

fays encore

auxdits seigneurs du

pays pour y pour

voyr à ladvenir,

car je me doubte

plus que jamays

que les affères

prendront plus

grand tant quil

ne seroyt de be

soing. Je vous

renvoye la com

mission quy ma

esté envoyé

pour signer, que

jey donnée à monsieur d’Embrun, parce que je ne vouldroys quele se trevat autre

que cele que je luy en expediay, de la quele je ne suis memoratif. Bien vous

asseurè je que jadvoue et advoeray ce que ledit seigneur aura fayct et ordonné

par quoy advisés den recouvrer une coppie et je la vous expedieray. Jey

apointé votre requeste comme vous verrés et escrit à messieurs du pays à ses

fins et croys quilz auront esgard au contenu dicele comme je les en prie

[213 v° : suite lettre de Lyonne]

[…] qui pourront servir pour le mois davril, après quelles seront recouvrer.

Je les poursuivray et les voue à cest effaict, mais passé icelluy comme

jay faict veoir à mesdits sieurs les commis, il ne fault pas sattendre

que je puisse plus fournir aulcune chose pour lesdites compagnies pour

limpossibilité quil y a de recevoir à loccasion de lennemy. Il vous plairra

donc leur mander dy pourveoir par cy après jay besoing pour servir aussi

sur mondit compte de la commission que je vous envoye presentement

à signer contenant le pouvoir que vous avez donné à monsieur d’Embrun

dordonner des deniers. Il vous plaira la me renvoyer. Il ma semblé

monseigneur, debvoir demander quelque taxe des peynes par moy

prinses à la recepte des deniers destinez pour ladite guerre que ma occupé,

ou mes gens, trois fois plus que na faict ma recepte ordinaire ;

et pour ce faire, je vous en presente requeste que je vous envoye sur

laquelle, sil ne vous plaict maccorder la somme que vous penserez

estre raisonnable, il vous plaira aulmoings me renvoyer aux

commis commissaires depputez à laudition de mon compte pour

my faire droict, sans lequel ranvoy ilz ne vouldroient me taxer,

actendu quilz ne se dispensent daulcune taxe pour ce que concerne

la guerre sans votre commandement. Je pense avoir en cela grande

raison et croy quil ny a comptable que se volust charger dune

si grande comptabilité quil nen tirast sallaire, mesmes quil

nest jusques icy advenu aulcun desordre par ma faulte et sil

vous plaisoit accompaigner votre renvoy dune votre lettre ausdits sieurs

commis, vous augmenterez lobligation que jay à votre service.

Monseigneur, je presente mes très humbles recommandations à votre bonne grace

et prie Dieu vous donner en très bonne santé très longue

[214] et heureuse vye. A Grenoble, ce XIIIme fevrier 1574.

Sil vous plaisoit descrire audit sieur

de St André de parler à mesdits sieurs

du païs de votre partie et quil les priat de vous

en despecher le mandement, et que daillieurs

vous leurs en escripviez prumptement, il y aura

moings de difficulté. Si sur icelle ou aultrement

comme il vous plairra, vous avez besoing

de quelque somme en attendant que mondit

compte sera cloz, je vous fournirey ce que je

pourrey.

Votre très humble et très obeissant serviteur

Lyonne

- TOME : XXII

- F : 213::

- F : 214::

- EXPEDITEUR : Lyonne, Sébastien de, receveur général des finances du Dauphiné

- DESTINATAIRE : M. de Gordes

- DATE :

TYPE : reponse

CAT : reelle

- DATE : 1574-02-13

TYPE : expedition

CAT : reelle

- DATE : 1574-02-13

TYPE : expedition

CAT : affiche

- DATE : 1574-02-17

TYPE : reception

CAT : reelle

- LIEU : Grenoble

TYPE : expedition

GPS : 45° 19' 91'' N ; 5° 73' 62'' E

- LIEU : Valence

TYPE : reception

GPS : 44° 93’ 33’’ N ; 4° 89’ 21’’ E[

- HYPERLIEN :

- BIBLIOGRAPHIE :

- NOTE : à la fin de l’endossement : « avec réponse »